Anxhela punon si modeliste në një fabrikë prodhimi veshjesh, në të cilën ajo ndërton dhe zhvillon modele të ndryshme veshjesh. Fabrika prodhon veshje për kompaninë “Zara”. Detyra e saj është të zbërthejë modelet e veshjeve në pjesë të nevojshme për realizimin e prerjes dhe qepjes sipas përmasave të kërkuara.

Pasi merr porosinë e rradhës, Anxhela hap programin kompjuterik CAD/CAM. Ky program e ndihmon atë të zhvillojë modelin e detajuar. Me kujdes dhe përqëndrim ajo ndërton skicën teknike të modelit dhe printon një nga masat e fustanit, për të bërë provat e nevojshme. Në këtë mënyrë, ajo bën prerjen dhe qepjen e copës sipas modelit të printuar, për të ndërtuar prototipin.

Prototipi provohet në një manikin, për të kuptuar nëse përmasat janë ndërtuar saktë. Anxhela vë re disa probleme në mënyrën si qëndron fustani në trupin e manikinit. Ajo bën sistemimet e nevojshme dhe më pas, ajo i tregon modelin përfundimtar përgjegjëses së saj. Modeli i fustanit dërgohet për prodhim.